Ommaviy oferta shartnomasi

Oxirgi yangilanish: 25 sentabr, 2026

SAMARQAND DAVLAT UNIVERSITETI "TALABALAR MEDIYASI"
LIDER YOSHLAR ENSIKLOPEDIYASIGA BIOGRAFIK MAQOLA JOYLASHTIRISH BO'YICHA
OMMAVIY OFERTA SHARTNOMASI

Ushbu ommaviy oferta shartnomasi (keyingi o'rinlarda — Shartnoma) Samarqand Davlat Universitetiga (keyingi o'rinlarda — Tashkilot) tegishli bo'lgan samdu-lider.uz internet sayti orqali yuritiladigan "Talabalar Mediyasi" platformasi (keyingi o'rinlarda — Platforma) ma'muriyati tomonidan ommaviy foydalanish uchun e'lon qilinadi. Ushbu shartnoma ensiklopediyaga kiritilishi rejalashtirilgan talaba, bitiruvchi yoki jismoniy shaxs (keyingi o'rinlarda — Nomzod) bilan O'zbekiston Respublikasi Fuqarolik kodeksining 369-370-moddalariga muvofiq tuziladi.

Mazkur Shartnoma ommaviy oferta hisoblanib, Nomzod tomonidan Tashkilotga biografik ma'lumotlar, fotosuratlar, ta'lim yutuqlari va boshqa axborotlarning elektron shaklda taqdim etilishi ushbu Shartnoma shartlarini to'liq, so'zsiz va cheklovlarsiz qabul qilinganini (aksept) anglatadi.

1. Shartnomaning predmeti

1.1. Tashkilot Nomzod taqdim etgan ma'lumotlar asosida Platformada Nomzodning shaxsiy sahifasini (biografik maqola, reyting ko'rsatkichlari, yutuqlar) yaratish va uni ommaviy e'lon qilish majburiyatini oladi.

1.2. Nomzod ushbu jarayon uchun o'ziga tegishli bo'lgan shaxsiy va akademik ma'lumotlarni, shuningdek, sifatli fotosuratlarni Tashkilotga taqdim etish majburiyatini oladi.

2. Tomonlarning huquq va majburiyatlari

2.1. Tashkilotning majburiyatlari:

Nomzod tomonidan yuborilgan ma'lumotlarni o'rganib chiqish va Platforma talablariga mos kelgan taqdirda saytga joylashtirish;
Nomzodning reytingini adolatli shakllantirish uchun faqat tasdiqlangan hujjatlar va yutuqlarga tayanish;
Platformaning uzluksiz ishlashini texnik jihatdan ta'minlash.

2.2. Nomzodning majburiyatlari:

Platformaga kiritish uchun faqat haqqoniy, to'g'ri va xatosiz ma'lumotlarni taqdim etish;
Boshqa shaxslarning mualliflik huquqlarini buzmaydigan, ruxsat etilgan fotosurat va matnlardan foydalanish;
Taqdim etilgan ma'lumotlar (shu jumladan ism-sharifi, surati, yutuqlari) ommaviy ochiq internet tarmog'ida e'lon qilinishiga va hammabop bo'lishiga rozi ekanligini tasdiqlash.

3. Ma'lumotlarning aniqligi va javobgarlik

3.1. Nomzod taqdim etgan barcha ma'lumotlarning haqqoniyligi va to'g'riligi uchun shaxsan o'zi javobgar hisoblanadi.

3.2. Yolg'on, soxta hujjatlar yoki birovning yutuqlarini o'zlashtirib taqdim etish holatlari aniqlansa, Tashkilot Nomzodning profilini ogohlantirishsiz Platformadan o'chirib tashlash va uni "qora ro'yxat"ga kiritish huquqiga ega.

3.3. Tashkilot saytdagi nosozliklar, uchinchi shaxslarning xakerlik hujumlari yoki provayderlar sababli saytning vaqtincha ishlamasligi natijasida yetkazilgan ma'naviy yoki moddiy zarar uchun javobgar bo'lmaydi.

4. Shaxsiy ma'lumotlardan foydalanish

4.1. Shartnomani qabul qilish orqali Nomzod O'zbekiston Respublikasining "Shaxsiy ma'lumotlar to'g'risida"gi qonuniga asosan o'z shaxsiy ma'lumotlarini (F.I.Sh., tug'ilgan sanasi, manzili, ta'lim muassasasi, yutuqlari, ijtimoiy tarmoq havolalari va fotosuratlari) yig'ish, qayta ishlash va Platformada hammabop tarzda e'lon qilishga ruxsat beradi.

4.2. Tashkilot ushbu ma'lumotlardan faqatgina universitet liderlari reytingini yuritish, ensiklopediya shakllantirish va ta'lim sohasidagi PR-tadbirlar maqsadida foydalanadi.

5. Shartnomaga o'zgartirish kiritish va uni bekor qilish

5.1. Tashkilot ushbu Shartnoma shartlariga istalgan vaqtda bir tomonlama o'zgartirish kiritish huquqini o'zida saqlab qoladi. Yangi tahrirdagi shartnoma Platformada e'lon qilingan kundan boshlab kuchga kiradi.

5.2. Agar Nomzod o'z profilini Platformadan butunlay o'chirishni xohlasa, u holda Tashkilot ma'muriyatiga rasmiy elektron manzil yoki maxsus Telegram-bot orqali murojaat qilishi lozim. Murojaat 3 ish kuni ichida ko'rib chiqiladi va profil o'chiriladi.